CAN comitat d'accion nihilista
VIDA VIDANTA : los conselhs practics per la vida de cada jorn

presentacion
LA VIDA DE CADA JORN, la vida vidanta coma aiman plan de dire los occitanistas, es pas totjorn aisida.

Per vos facilitar la vida vidanta, lo CAN a creat una pagina especiala que vos dona tot un fum de conselhs practics.
  • transformar lo vòstre PC de 15 Kg en ordinator portable! [consultar]
OLP
publicacions
comunicats
vida vidanta
kit de subrevida en mitan occitanista


transformar lo vòstre PC de 15 Kg en ordinator portable!

Al jorn de uèi, viure sens un ordinator es pus gaire possible, sustot quora òm es implicat dins la vida associativa : comunicats de redigir, protèstas de metre en fòrma, tracts de preparar, diccionaris microdialectals de picar, letras de ligasons d'estampar, fichiers d'aderents de téner a jorn, rampèls de pagament d'escotisson de mandar...

    Per far tot aquel trabalh, es acabat lo temps vièlh de las fichas de bristòl dins la bóstia de calçaduras, la maquina d'escriure a bolas e los estencils Geistetner, los tracts sortits a la maquina a alcòl, las adreças escrichas a la man sus las envelòpas... L'ordinator simplifica tot aquel trabalh de picatge, escritura, classament. Enfin, l'associacion que ne'n sètz lo responsable a estalviat pro d'argent per se pagar un ordinator : l'ecran de 15 poçes de per davant e de 50 centimètres de cuol, l'unitat centrala de 90 X 20 X 70 cm, lo clavièr del fuóc de Diu qu'i podriatz picar a quatre mans, la mirga amb sas tres tòcas, sa rotleta e sos 2 mètres de fial. Lo tot pesa pas mai de 15 Kg e ocupa un mièg mètre cubic del local de l'associacion; sètz urós.

    Mes ara lo mond evoluís pro viste, e lo temps d'obténer la subvencion pel vòstre equipament informatic, la mòda s'es botada a l'ordinator portable. Cadun se passeja uei amb lo son portable a l'espatla, prèste a l'utilizar en tota escasença. Somiatz d'escambiar lo vòstre pòste fixe contra d'una d'aquelas meravilhas de la tecnica de uèi e de vos passejar emb lo vòstre ordinator. Ailàs! las vòstras finanças vos permeten pas aquel investiment pertant de grand besonh.

    Gràcia al CAN, qu'a saubut trobar per vos una solucion eleganta a ren-non-còsta o gaireben – per lo prètz del Diccionari occitan de Loís Alibert, valent a dire una misèria – lo vòstre sòmi pòt venir una realitat :
Un sistema revolucionari [veire]