L'OBRADOR de Literatura Pestilenciala (OLP) del Can es plaçat jol doble pairinatge del Prerafaëlita Tibetenc e del Rasdicalcionari. Aquel pairinatge, l'avèm pas demandat als pairins Micheu Chapduelh, grand satrap (satrape?, satrapi?) del primièr e J. R. Rascal, autor anonim del segond. De tota faiçon, lo CAN s'es acordat lo drech de pilhatge de la produccion occitana, e se'n va pas privar.  Per los que serián pas assabentats del PT o del Rasdicacionari, rapelarem que lo Prerafaelita Tibetenc es una revista creada per lo Micheu Chapduelh, del temps qu'èra pas encara dintrat dins la secta dels animistas lemosins e que sa creativitat era pas encara escantida per un respècte servil a l'esséncia de la pretenduda "arrrma lemosina" e son esperit completament rosegat per lo "New Age" arqueò-rural. Lo Prerafaelita Tibetenc aviá son OLP, l'Obrador de Literatura Potenciala. Lo CAN a creat son Obrador de Literatura Pestilenciala, per ensajar de donar un briconèl de ferum  a una produccion literària occitana sens flaira ni sabor. Lo Rasdicacionari es un dicionari de neologismes publicat fa gaire per I'IDECO. A el tot sol, aquel libròt val mai que la mitat de l'edicion occitana – tots editors amassa – de las dètz darrièras annadas – mes es vertat qu'aquò vòl pas dire grand causa.

L'OLP trabalha, jos la responsabilitat de l'ALEN e dins lo respècte de las metanòrmas de l'OVNI (Occitan Virtual Normativizat Institucionalament) a fargar lo NOVLenga (Neo-Occitan Virtual Language). Sas produccions son publicadas dins doas publicacions numericas: lo DICANCIONARI, diccionari informatic elaborat sus las basas conceptualas del Rasdicalcionari; e ÒS, la revista numerica consultabla en linha de critica e de creacion literària.